Thursday, October 1, 2009

ನೀನು ನನ್ನವನಾಗಬೇಕು

ಅಲೆಗಳ ತೆರನಲ್ಲಿ ತೀರ ಸೇರುತಿರುವ
ನಿನ್ನ ನಗುವಿಗೆ
ಗೋಡೆ ಕಟ್ಟಿ ಬಂಧನ ಹಾಕುವೆ;
ಅವು ನನ್ನವಾಗಬೇಕು!

ದಶ ದಿಕ್ಕಲೂ ಓಡುತಿರುವ
ನಿನ್ನ ಮಾತುಗಳನು
ಹಗ್ಗ ಹಾಕಿ ಎಳೆದು ತರುವೆ;
ಅವು ನನ್ನವಾಗಬೇಕು!

ನಿನ್ನ ಕೈ ಹಿಡಿದು ವಿಹರಿಸುತ್ತಿರುವ
ಕೈ ಕೊಚ್ಚಿ ಹಾಕಿ
ನಿನ್ನ ಕರೆತರುವೆ;
ಅವು ನನ್ನವಾಗಬೇಕು!

ನೋವಿನಲೂ, ನಲಿವಿನಲೂ,
ಸರಸದಲೂ, ವಿರಹದಲೂ,
ಬಾಳ ಪ್ರತಿ ಹೆಜ್ಜೆಯಲೂ
ನಾನೇ ಇರಬೇಕು ನಿನ್ನೊಡನೆ;
ನೀನು ನನ್ನವನಾಗಬೇಕು!!

ನೆನಪುಗಳು

ತಿರುಗಿ ಬರುವವಾ
ಆ ದಿನಗಳು ಮತ್ತೆ?

ಸಿಗದ ಡಬ್ಬದಿಂದ ಕದ್ದು ತಂದ
ಆ ಸಿಹಿ ತಿನಿಸುಗಳು,
ನನ್ನ್ನ ಬದಲು ಹೊಡೆಸಿಕೊಂಡ
ಆ ಹೊಡೆತಗಳು;

ಮಳೆಯಲಿ ನೆನೆದು ಬರುವಾಗ
ಕೈ ಹಿಡಿದು ಕೊಡೆಯಲಿ ಕರೆದ ಕ್ಷಣಗಳು,
ಅಮ್ಮ ಬೈದಾಗ,
ಅಳುವ ಕಣ್ಣೊರೆಸಿದ ಆ ದಿನಗಳು;

ತಿರುಗುವ ಬುಗುರಿಯ
ಅಂಗೈಯಲ್ಲಿ ಆಡಿಸಲು ಕೊಟ್ಟ ಕ್ಷಣಗಳು,
ಜಾತ್ರೆಯ ಪೀಪಿಯ
ಕಿವಿಯಲಿ ಊದಿದ ಆ ದಿನಗಳು;

ಮನಸಲೆ ಕೂತು ಕೂಗುವ ಗೆಳೆಯ,
ಹೇಳು ನೀನು..
ತಿರುಗಿ ಬರುವವಾ ಆ ಕ್ಷಣಗಳು ಮತ್ತೆ?